2024 Vriendenmiddag 9 maart

Vriendenmiddag neeng meert

Der bint slim veule reclamespotties deur Radio Drenthe uut ezunden, veur de Vriendenmiddag op negen meert in café Hofsteenge in Grolloo. Dus is ’t zaak om der op tied te wezen want ’t kun wel ies gloepens druk worden. Um krap half twei dreide oeze auto ’t parkeerterrein van Hofsteenge op. Der is nog genog ruumte.
De Dreintse vlag wapperde en der stun een banner in de hal, ’t kun dus niet missen, wij waren op de goeie plekke. De jassen an de kapstokken hangen en even in de spiegel kieken of ’t haor nog in model zit. Hielemaole klaor veur ’t feest binne wij de zaal in elopen en toen bleek da’w eigenlijk wat te vrog waren. Mar dat gaf niks zei’n paar bestuurleden wij mussen mar een plekkie zuken. Dat was niet zo muilijk der was nog plek zat.
’t Bleek dat de penningmeister oponthold had deur een umleiding wegens wegwarkzaamheden. Zij had de koffiemunten bij heur, vandaor da’w wat te vrog waren. Toen ze der was kregen en anwezigen twei munten veur koffie of thee. Veur aandere consumpties mussen wij natuurlijk wel zölf munten kopen vanzölf.
Um twei uren gung veurzitter Roelof Koops oes welkom toeroepen en nog wat huusholdelijk mitdielings vertellen. ’t Belangriekste was wel dat der een verlotting was van mooie priezen. Daornao hef hij tenielveriening UBI uut Bunen an ekondigd en weinsde de meinsen in de zaal een plezierige middag.
UBI zul veur oes ‘Biestenbende op de Keizershoeve’ op de planken brengen, een klucht in drei bedrieven, deur J.Silkens  vertaald uut ’t Duuts. Twei breurs, d’íene , Frans, een aordige vent die graag goed döt, d’aandere, Geert, een bullebak van een kerel die ‘t mit iederiene oniens is, wat ze ok zegd. Of ‘t dizze bullebak altied wel volgens de regels döt mit de varkensfokkerije van de beiden breurs. Daor kuj wel wat vraogtiekens bij zetten.
Frans hef de knappe studente Lisa naor de boerderije haald as stagiaire diergeneeskunde. Zij is um wat bij te verdienen ok bereid de huushulding wel verzörgen. Op de klompen kuj wel anvulen dat Geert daor faliekant op tegen is, hij kan gien pottenkiekers gebruken.
Lisa ontdekt dat der verboden gruimiddel in een kastie stiet, waorvan zij in aoverleg mit heur moe, elke middag wat deur zien eten reurt. ’t Kan niet uutblieven Geert kreg ’t zo slim te pakken dat de pastoor der bij ehaald wordt. Die lust graag een borreltie en hef in dronken toestaand een bigge van de gebroeders dood ereden. Ok de onhaandige dochter van de buren die al jaoren smoor verliefd is op Frans komp geregeld langes.
Zoas dat bij kluchten altied ’t geval is der bint vake komische taferelen mit lachsalvo’s tot gevolg. An ’t ende van een klucht komp alles op zien pooties terechte, zo ok in dit geval.
Nao ofloop van de uutvoering bint de speulers en wat der umhen löp uutvoerig bedaankt en kregen ze nog wat mit hen huus.
Intussen was de spanning al aordig op elopen want de verlotting mus nog of ewarkt worden. Daornao kun iederiene mit een goed gevuul op huus an nao een gezellige middag.
‘t Bestuur van de Vrienden RTV Drenthe kan terugge kieken op en geslaagde Vriendenmiddag.

Bedaankt.
Jan Bruins, De Vaort.