Op bezeuk in Hemmeltied

Vanaof april neugt Harm en Leonie alle zaoterdaogen een verening op veziet in de studio in heur programma Hemmeltied. De Vrienden van RTV Drenthe muchten op 1 april as eerste op bezeuk kommen.
Met tien leden in de studio en en net zoveul in ‘t atrium hadden we daor een bar gezellige mörgen. Henny van der Veen vertelde in het eerste uur eerst wat over oonze verening, waorom dizze opricht is en wat we zoal doot. Omdaw gien eigen clubleed hebt, kozen wij veur ‘Hier kom ik weg’ van Daniël Lohues. Dit leed vunden wij het best bij oons passen.
In het tweede uur was er plek veur het blokkie Vrolijke Berichies waor neigies veurlezen wörden deur Jan Tijink en Geesje Oosting. Ok was der een culturele bijdrage die deur Aagje Blink invuld wör. Zij las een eigen, heul actueel, gedicht over Vincent van Gogh veur. Henk Hingstman en Willie Warners speulden een quiz, waarbij Harm tien, sums maor slim moeilijke, vraogen op ze aofvuurde.
Intied zat de aander helft van de anwezigen in het atrium gezellig met mekaor met een kop koffie veur de tillevisie. Daor kun alles mooi volgd worden. De mörgen vleug om en zo waren we alweer to an het daarde uur.
Geesje Oosting en Riekie Bos sjoelden allebei om zoveul meuglijk punten bij mekaor te sprokkeln veur de Hemmelkampbokaal. Het verschil in leeftied tussen oons jongste en aoldste lid leverde ok punten op, al was dat niet zoveul. Dit komp omdaw niet zu’n groot verschil in leeftied hebt bij oonze leden. 
Oons bezeuk wör aofsloten met het lèeste rondtie. Hierin muchten dree leden meziek oetzeuken. Vroukje Hartlief koos veur ‘Drèents’ van Harm en Roelof, omdat ze dit een mooi leed vun en omdat ze ’t ok belangriek vindt daw zoveul meuglijk Drèents blieft praoten. Bert van der Geijn, gien Drent maor trouwd met een Drèentse, wel lid, koos veur ‘Zund’ van Noud Bongers, een Brabantse zanger. Streektaol is streektaol, en dit was zien streektaol. Mooi dat dit ok kun! En as lèeste was Dina van Weperen an de beurt. Dina woont in Oosterwolde, maor holdt veul van oonze provincie en is al heul lang lid van oonze club. Zij wol geern van René Karst ‘As ik deur Drenthe fiets’ heuren. ‘Gewoon omdat ik heul graog fietsen mag in Drenthe. Ik hol van Drenthe, het veult hier zo eigen, zo waarm!’ lèegde ze heur keus oet. Veur Dina was de oetzending extra mooi, want een vriendin van heur van vroger was al heul lang naor heur op zeuk en zag heur nou zomaor op tillevisie. Wij bint wel beneid of ze nao de oetzending al contact had hebt met mekaor!
En toen was ’t zomaor twaalf uur en was de oetzending aoflopen. In het atrium wör nog even naopraot met Harm en Leonie. Hier bleek dat elk ’t een mooie mörgen vun!

Dit is schreven deur Henny Bouwman