Optreden toneelvereniging Nut en Genoegen

Op zaoterdag 2 meert trad tenielvereiniging Nut en Genoegen oet Eksel met het stuk 'oppassen geblaozen' op in het Wilhelminazalencentrum in Beilen. 120 toeschouwers geneuten van het stuk.

Ik zat achterin de zaal en har een goed overzicht over alles en iederien. Een meter of zeuven veur mij in de zaal zat een mannechie dat een beetie tegen de ruggen van de mèensen veur hum zat an te kieken. Dan dreide hij zuch naor links, dan weer naor rechts. Dat gung de hiele aovend deur. 'Die man zöt der niet veul van van', dacht ik. 'Die argert zuch vast'.

Toen het oflopen was, stund hij nao een poosie op en gung met zien vrouw naor de oetgang. Ik kun het niet naolaoten um naor die man toe te lopen um te vraogen hoe het wèest was. Maar in plaots van een bedrukt kieken was er een briede grijns op zien gezicht te zien. "Hoe vund ie het?", vruug ik hum. "Mooi man", zee hij en zien vrouw vulde metien an: "ja heur, we hebt geneuten. Allent jammer dat het geluid niet zo goed was." Ik zag an het gezicht van het mannechie dat hij nog meer wol zeggen. "Hoe kunt ze zoveul malligheid bij mekaor zuken", zee hij nog. De grijns veraanderde in een lach. Waarschijnlijk schöt hum een stukkie oet het tenielstuk te binnen.

Misschien wal het stukkie waor de breurs gien hoge pet op hebben over vrouwen en zeden dat een trouwring het zölfde zul wezen as een halsbaand veur een hond. Mao dat kan hij niet meer zeggen, want zien vrouw zegt geliek: "kom, we gaot". Ze loopt naor de garderobe, pakt de jas en gaot op hoes an. Die komt de volgende keer wal weer.

Bekijk de foto's