Vriendenfietstocht, 9 september 2017

Wij waren oetneudigd um um 10 uur in Lhee, in Hotel 'De Börken' te kommen. Het bestuur had het veur mekaar kregen dat het programma Hemmeltied vanoet de 'De Börken' kwamp. Mooi dachten wij, Johannes en Marie Venema oet Vries, kunt wij geliek kennis maken met Leonie, de neie presentator naost Harm Diekstra, maor Leonie was der niet, ze was ziek. Lo Dijkstra vuul veur heur in, ok niks mis met.

As wij oet Vries vertrekken, regent het, zwarte lochten, daorum was de dielname niet zoas het wezen mus. Nao de oetzending van Hemmeltied, gaot wij op pad. Nao 10 minuten, bij het gebouw van Astron, een stevige bui. Nao een stief kwartier schoelen, gungen we over de heide naor Ruinen. Veurbij de neie schaopskooi, het bezoekerscentrum Dwingelderveld en de mooie meulen. Hier mussen wij oetzuken hoeveul meulens der nog in Drenthe bint. Dat weet wij nou, der bint nog zesendattig over.

In Ruinen moe’w ‘de Heerlijkheid Ruinen’ route volgen. Wij mussen naor De luie Tuinman, aan de weg naar Gijsselte. Nou dat is gien 'luie tuinman', de koffie stund klaor en je kun der ok pannenkoeken eten. Hier mussen we raoden wat veur veurwarp daor stund. Het was een koehoorn, an ien kaant dicht en een kleine opening aan het dunne einde. Alles kwam langs, een boerhoorn, een ding um een 'zeupie' veur de schaopherder in te doen en veul meer. Nee dat was het allemaol niet, vrogger weurd er buskruut in daon. Het was een kruuthoorn.

Verder via knooppunten langs 't Olde Posthuis in Anholt en over het Commissaris Cramerpad, naor het informatiecentrum in Spier. Hier mussen we raoden hoeveul bonen ze in een weckfles stopt hadden. De schattingen lupen oetien van 500 tot 2000. De waorheid lag ok hier in 't midden: ongeveer 1150 bonen zaten der in. Verder langs de randen van het Dwingelderveld terug naor Lhee. Hier weur deur de vicevoorzitter Roelof Koops en de oetzetters Wim en Carla Oosting de priezen oetreikt. 1e weur Henk Hingstman oet Westerbork, 2e Anne Meinders oet Norg en 3e Geesje Hingstman ok oet Westerbork.

Opnei een prachtige tocht. Volgend jaor geern mooier weer en meer dielnimmers!

Johannes Venema (dielnimmer)

Klik hier voor foto's